تاج فى عز الصيام

التاج الجميل ده بعتتهولى
الأخت العزيزة الدكتورة روفى
دا بدل متبعتلى كوبية خُشاف أشربها بعد الفطار ، أو بلاش الفطار .. كانت بعتتلى طبق فول بالزيت الحار أتسحر بيه حتي
يالا بقى .. ماعلينا
وفي حاجتين عايز أقولهملك يادكتورة روفى
أولا : أشكرك على ثقتك الغالية ، وعلى فكرة دا أول تاج يتبعتلى
ثانيا : أعتذر عن تأخرى في الرد عليه بسبب انشغالى
اجاوب بقى

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟
هأختار عصر القائد العظيم صلاح الدين الايوبي
ذلك القائد النبيل الذي سار علي نهج الخليفة عمرو بن الخطاب في توحيده للعرب واسترداد بيت المقدس
ذلك الزعيم العادل التي شهدت فترته عدلا و صلاحا
ذلك القائد عرف كلمة السر المفتقدة الآن .. كلمة السر هي توحيد العرب
أما أن كان السؤال يقتصر علي فترة مابعد الملكية
فطبقا لنظرية أحسن الوحشين
أختار عصر ناصر رغم عيوبه و أخطاءه الجسيمة .. وذلك لإيمانه بالعروبة و القومية

اول اولويه فى حياتك عيلتك ولا شغلك ولا اصحابك؟
اول اولوية في حياتي هي حياتي اللي بيشغلها حبي لعيلتي و حبي لاصحابي و حبي لشغلي و حبي لأحبابي

ايه اكتر حاجه بتحبها فى رمضان؟
اكتر حاجة بحبها في رمضان .. الوحدة
الوحدة اللي أحنا مفتقدنها
في العادي .. كل واحد بيقول يالا نفسي .. محدش همه علي حد .. مفيش حاجة بتجمعنا .. ولا في حاجة مشتركة بينا
أما في رمضان أتفرج كام حاجة بتجمعنا .. أتفرج علي الوحدة اللي بينا
الناس كلها مشتركة في الصيام
زحمة علي الراجل بتاع العرقسوس و التمر
في الساعة الأخيرة الناس كلها بتجري عشان تلحق الفطار
لو ضرب عليك المدفع وأنت لسه في الشارع تلاقي ألف واحد بيعزمك علي الفطار عنده
وتلاقي ألف أيد بتتمدلك بتمرة عشان تفطر عليها
كلنا عندنا طاقة إيمانية عالية .. وبيجمعنا حب التقرب إلي الله في الشهر الكريم
طاقة العطف بتزيد عندنا .. طاقة التقوي وصد المعاصي بتقوي عندنا
كل دي مظاهر للوحدة اللي بتجمعنا في شهر رمضان
ياريت رمضان كان السنة كلها

اوصف ليا اجمل فطار ممكن تفطره
أنا ممكن أفضل أمني نفسي في الصيام بأشكال و ألوان من الأكل ولكن لما يجي وقت الفطار
ببقي عطشان أوي
ويا ويله شفشق التمر الهندى لو وقع في أيدى
أو الخشاف
أو حتي المياه الساقعة
وبعد الشرب ده كله .. كل حاجة علي مائدة الفطار بتتساوى ، وأي حاجة بتقضى الغرض
والفطار يزيد جمال و جمال في وسط اللمة و الصحبة

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
من الطبيعي أن أى حد مش هيقول علي نفسه ظالم
ولكن اللي داق طعم الظلم حتي وأن كان موقعش عليه ووقع علي حد تاني
واللي مؤمن بان الحكم ده مسئولية و عارف كويس أنه هُيسأل يوم القيامة و يتحاسب عليها
يتردد ألف مرة قبل مايفكر يظلم
عشان أتاكد أني حاكم عادل ، هكون دايما متواصل مع الأفراد ومش هيكون في وسطاء بيني و بينهم

اللى بيبوظ الحكام .. نفسهم؟ ولا الشعب؟ ولا الحاشيه المقربه؟
أنا شايف أن كل واحد من التلاتة بيمثل ضلع لمثلث الفساد
الضلع الأول بيبدأ من الحكام أنفسهم .. من نفوسهم الضعيفة و ضمائرهم الخبيثة ، من عدم تحملهم المسئولية والفصل بينهم وبين الشعب
تاني ضلع الحاشية المقربة التي تري في الفساد العام مصلحة لها
أما الضلع التالت من غيره ميكتملش الفساد .. وهو ضلعنا .. ضلع الشعب .. ضلع الصمت .. ضلع الخضوع .. أيوه أحنا بنشارك في الفساد ده بصمتنا و خضوعنا
لا يغير الله مابقوم حتي يغيروا ما بأنفسهم

مين أكتر اعلامي مصري بتحترمه؟
حمدي قنديل

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟

لا .. ما قريتوش

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
كنت هأتمني برضه أنى اشتغل صحفي

ايه تانى بلد تتمنى تعيش فيها بعد مصر؟
إيطاليا .. ومعرفش ليه؟
جايز عشان كانت لغتى التانية في الثانوية إيطالي

اوصف ليا ترتيبات اجمل فرح ممكن تحضره
ساعات كتير الأناقة بتبقي في البساطة
أهم حاجة يكون الطرفين بيحبوا بعض وراضيين ، ويكون كل المعزومين جايين يهنوا من قلبهم

بتراعي كلام الناس والقيل والقال؟ لو اه او لو لا قول لى ليه؟
في أغنية كانت بتقول .. كلام الناس لا بيقدم ولا يأخر .. كلام الناس كلامهم حيرة مش أكتر
أنا مقتنع تماما أنهم في جميع الأحوال هيتكلموا
بس مدام أنا عارف أن أنا صح .. مبتفرقش معايا
بس ساعات الواحد بيغلط وممكن ما يخدش باله .. ساعاتها لو كلام الناس ده من باب النصيحة و الخير لازم أراعيه

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
والله مش عارف
بس عامة الواحد مش هيموت يعني لو ملقاش الموبيل و الكمبيوتر و الكاميرا الديجيتال
بس الحيرة في أنه ياترى العصر ده هيكون أحلى ، ولا هلاقى نفسي بتباع في سوق الرقيق
عامة هأجرب مش هأخسر حاجة .. أبقى أتصل بصاحبى يبعتلى آلة الزمن بتاعته

السعاده هى؟
الرضا عن النفس اللي بييجي من رضا ربنا

عندك أمل ؟؟ أسبابك ؟
أكيد .. عشان أقدر أعيش
مع أن في ساعات كتير أمل بتمشي وتيجي صاحبتها .. اكتئاب

لما تحب تهرب من كل شئ بتروح فين؟
في بداية الأمر لما احب اهرب من شئ .. باروح السرير
علي أمل أن النوم يعالج تفكيرى المشتت ، ولما اصحي باواجه نفسي و أعيد النظر للامور

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
أول ما أختي منة الصغيرة نادتني بـ .. آبيه أحمد

لما بتعمل عمل خيرى بيكون ايه هو دافعك الاول؟
طبعا وجه الله الكريم ، و أني أحس بأني سبب سعادة شخص محتاج
و أحس أن طاقة الخير لسه بخير جواي

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لا .. الحمد لله
وربنا يتوب علي كل اللي بيشربها
قول آمين ياللي بتشربها
أما عن الست اللي بتشرب سجاير ، فالمنظر ده بيضيقني أوي
جايز يكون عشان ده مخالف تقاليدنا .. وكمان نظرتنا للست بأنها حاجة رقيقة ولكن حاجة زي كده طبعا بتبوظ الرقة دي

بتعرف ايدك اليمين من الشمال ازاي؟
الحكاية ده كانت بتمثلى مشكلة عويسة لغاية ما أكتشفت الحل
اعمل نفسي كأني بأكل .. وأشوف أنهي أيد هأمسك بيها المعلقة .. تبقي دي اليمين

ايه اكتر اله موسيقيه بتحبها ؟
بأحب الأورج جدا .. وكان نفسي أتعلمه
وكمان بحب الجيتار الأسباني

فى رأيك ليه الذوق والنخوه اتعدموا؟
ومين قال أنهم اتعدموا .. قلوا ماشي بقي فيهم ندرة ماشي ، لكن اتعدموا لا

ايه الحاجه اللى لو حصلتلك تبقى سعيد قوى؟؟؟
حاجات كتير تخلينا سعيد
لما أشعر برضا الله عني ، اللي من نتايجه رضاي عن نفسي
لما أوضاعنا تتحسن ، و نعيش في جو مليان عدل و صلاح و مصرنا تبقي أحسن
لما أحقق أحلامي ، وأشعر بحب الناس كلها ، لما أصاحب ناس جديدة

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
عمري ما فكرت في الماديات
ولكن لو مصرة أنا بحب الخضرة و الهدوء و الطبيعة و البساطة و الزرع أوي

البحر و لا النيل؟؟؟
النيل .. جايز عشان بأشوفه كتير و ارتبطت بيه

مركب و لا طياره؟؟
جايز عشان مجربتش الطيارة .. فأقدر أقول مركب

مجنون و لا عاقل؟؟
لغاية دلوقتي عاقل .. بس ماأعرفش أيه اللي هيحصل بعد كده
وبرضه مش هأنكر أني ساعات بأستخدم الجنان
في أوقات كتير بيبقي مفيد

تقرأ كتاب و لا تتفرج عليه فيلم؟
أنا بحب القراءة جدا .. ولذلك أفضل الكتاب خاصة وأني بتفاعل مع الكتاب أكتر .. وده طبيعي لأن الكتاب بيرفع درجة التخيل و الرسم الذهني
بعكس الفيلم رغم عشقي للسينما .. لأنه ممكن تحس أنك متلقي لا أكثر

بتمرر التاج لمين؟؟؟
آه .. أهو ده اللي أنا خايف منه
خايف أمرره لحد يدعي عليا .. والدعوات مستجابة في رمضان

أمري لله .. أمرره لــ

عبد الرحمن البورتراوى ، ياسمين بتاعت الحواديت ، زيزى صاحبة البئر ، ماعلينا الجميلة

عاشقة الوطن ، حازم شلبى ، سهر صاحبة أسهر عيون ، المواطن الزهقان ، تمر حنة

فنانة فقيرة ، حاجات إيمان ، صاحبة حياة الأحلام ، ساكنة القلب ، حسام مراد

الأستاذ ، آخر قرصان ، مونمن البنوتة

My Hope$

و أي حد غير الناس دي عايز التاج ، أنا مش هأستخسره فيه .. ياخده وحلال عليه

وكل سنة وأنتم طيبين