مقعد الحياة

مقعد الحياة هو تجربتى الأولى فى كتابة سيناريو للكوميكس

وللى مايعرفش الكوميكس .. هو فن الصور أو الرسوم المتتابعة .. حاجة كده زى مجلات ميكى وفلاش

المهم أنا كتبت السيناريو وكان من المقرر أن صديقى الفنان عبد الرحمن هيرسمه عشان هأنزله فى مشروع التخرج

ولكن استبدلناه بكوميكس تانى بعد كده .. وفى مرة تانية أن شاء الله هأبقى أنشر الكوميكس اللى احنا وضعناه فى مشروع تخرجنا

القضايا اللى بيناقشها السيناريو ممكن تلاقوا أنها قضايا قديمة شوية ولكن فى فترة تنفيذ مشروعنا كانت هى القضايا اللى على السطح

وطبعا السيناريو ساخر بحكم أن مشروع تخرجنا كان مجلة ساخرة

أترككم مع السيناريو

-----------------------------------------------

مقعد الحياة

كادر 1
( الحبيب يسير بجوار خطيبته ماسكا يدها ، يسيران على كورنيش النيل ، ويظهر فى الكادر مقعد سيمران عليه بعد لحظات )
الحبيبة : عارف ياحبيى أجمل حاجة فينا إيه
الحبيب : إيه ياروحى
الحبيبة : أننا متفاهمين دايما

كادر 2
( جلسا على المقعد ، الحبيبة شاردة ببصرها )
الحبيب : سرحانة فى إيه ياحبيبتى ؟
الحبيبة ( تتنهد ) : مفيش ياحبيبى ، كنت باتخيل حياتنا الجميلة بعد الجواز

كادر 3
الحبيبة : تخيلت ياحبيبى أن احنا جبنا ولاد بقى ودخلناهم مدارس خاصة
( بدأت تظهر علامات الغضب والضيق على وجه الحبيب الذي رفع حاجبه مستنكرا )

تستكمل الحبيبة : وتخيلت بقى وهما صاحيين الصبح وأنا باعملهم اللبن قبل مايروحوا مدارسهم
( يزداد وضوح الغضب على وجه الحبيب ، ويتصاعد الدخان من رأسه )

كادر 4
تستكمل الحبيبة : وباعملهم بقى السندوتشات فى الفينو ، ولما كبروا بقي دخلنلهم الدى أس ال وطبعا تحت رقابتنا ياحبيبي
( الحبيب يصل إلي ذروة ضيقه ، وتبدأ رأسه فى الأشتعال )

كادر 5
تستكمل الحبيبة : وباتخيل كمان ياحبيبـــ
يقاطعها صارخا : لاااااااااااااااااااااااا .. حرام .. كفاااااااااااااية

كادر 6
الحبيبة : فى إيه ياحبيبى ، باخطط لمستقبلنا
الحبيب صائحا : مستقبل إيه بس .... أولا أنا مش هأدخل دي أس ال خالص ، انتي ماتعرفيش ان الكيلو بايت بقي أغلي من الكيلو لحمة ، وبعدين فينو أيه اللي أنتى هتعملي فيه السندوتشات ، ماتعرفيش أن الدقيق غلى والخمسة فينو بقوا بجنيه ، وكمان عايزة تشربيهم لبن ، أنتى ناسية ان اللبن فيه سيراميك



كادر 7
الحبيب يستكمل : ومدارس خاصة إيه بس ، أنتي اتهبلتى أدفع الأف فى مدارس والعيال تخرج في الأخر عواطلية .. وغير كده اساسا مين قالك أني هأجيب عيال ، العيال دلوقتي بيجيلها حصبة وعشان كده مش هأجيب عيال خالص
( علامة استفهام كبيرة فوق رأس الحبية )

كادر 8
الحبيبة : أنا كنت حاسة من الأول اننا مش هنتفق
الحبيب : احسن برضه ... عننا ما أتفقنا
( كل منهما يخلع دبلته ويلقيها علي المقعد ويسيران في اتجاهين متضادين )

كادر 9
( حبيبان أخران يمران من أمام المقعد ، ويندهشان من المفأجاة فقد وجدوا الدبلتين )
الحبيب : خلاص ياحبيبتى مشاكلنا اتحلت وأدى الدبل جت من عند ربنا
( يجلسان علي المقعد ذاته فارحين .... تشرد الحبيبة ببصرها )

يسألها الحبيب : سرحانة في إيه ياحبيبتى ؟؟
( المقعد يظهر من الخلف وكأنه له فم ويبتسم ابتسامة خبيثة )

تمت