حوار يستحق التفكير

تحديث

نسيت أقول أن الموضوع دا واحد من موضوعاتى فى مجلة الحقنة

حينما ركبت المترو هذه المرة حالفنى الحظ فى أن أجد مقعد علي غير العادة .. جلست بجوار رجلين يبدو عليهما انهما في الثلاثينات من العمر كما يبدو انهما صديقان
ومن أحدي المحطات صعدت سيدة ذات ثياب بالية تحمل علي يديها طفل نائم .. وبمجرد صعودها ظلت تردد

ساعدوني الله يباركلكم .. انا ام لأربع اطفال أبوهم مات وسابهوملي .. منهم طفل مصاب بمرض خطير و بيحتاج حقنة كل اسبوع ب 300 جنيه .. ما عرفناش نحصل على علاج على نفقة الدولة .. ساعدونى ربنا يبعد عنكم

هنا بدأ رجل من الذين بجانبي يدخل يديه في جيبه .. الا أنه فؤجي بالأخر يسمك ذراعه فى أشارة منه أن لا يفعل
وهنا لن أنسي أن الاحظ تلك النظرة التي رمقتها السيدة لذلك الرجل .. وكأنها تتوعده لأنه سببا في قطع قوت يومها

وبعد أن مرت السيدة وحاظت بالفعل علي تعاطف حوالي 6 أفراد فعليا هبطت من تلك العربة للتى تليها

وهنا بدأ الحوار بينهما .. حوار لا أعتقد أن من انتبه له سيتخاذل عن متابعته للنهاية .. وحتي وأن كان سيضطر لترك محطته التى من المفترض أن يهبط فيها

أيه ياعم انت منعتني ادي للست حاجة لله ليه؟ .. مش حرام عليك
حرام عليا أيه يابنى .. شكلك كده علي نيتك
علي نيتي أيه بس .. ياعم أنت مش عايز تديها أنت حر .. ليه ضيعت عليا الثواب
ياعم الناس دى بتكسب اكتر منك اضعاف مضاعفة .. وكل دى اشتغالات والله
ياعم انا مالى أنا بأديها اللي في النصيب .. وثوابه عند الله .. وربنا يجازيها هيا بقى أن كانت بتمثل
ياعم والله بيكسبوا اكتر مننا .. مش مصدقني؟
أنا بأسمع كده يعني .. بس مش شايف أن دي مبالغة؟
مبالغة؟ .. طيب بقي طرطء ودانك أوى و اسمعني كويس
ارغي ياعم
عشان لما اقولك هما بيكسبوا كام في اليوم .. وماتقولش عليا أنا بأفشر عليك أو بأفتي .. هنحسبها واحدة واحدة .. وكمان هنحسبها بالمنيمام
احسب يا سيدى

هنا طبعا لا أخفى عليكم .. أن كل المتابعين للحوار وكأنهم يتابعون فيلما اجنبيا مثيرا يُعرض للمرة الاولي .. وأنا واحد منهم

بص ياعم لو افترضنا أن الواحد من دول هيطلع مثلا في عربية أغلبيتها عالم قساة القلب و عديمي الرحمة .. هيطلعله كام بالميت كده .. وخد بالك هما بيختاروا الاوقات اللي بتبقي فيها زحمة
هيطلعله كام ياسيدى ؟
بس هنقول أن من العربية كلها هيتعاطف معاها حوالي 5 أفراد .. وكل واحد يديها جنيه .. يبقي طلعت من العربية الواحدة بخمسة جنيه .. اضرب الخمسة جنيه دى في 8 عربيات للمترو الواحد هيبقي 40 جنيه .. وركز معايا لأن كل ده في مترو واحد .. مش هبالغ معاك اوى .. ونقول بالميت أن الست دى هتعمل الحكاية دي فى خمس متروهات بس .. لأن جايز يبقى عندها سبوبة تانية يعني بعد الضهر .. يبقي ايراد الست في اليوم الواحد 200 جنيه .. لو قلنا أن الست دى هتشتغل فى الشهر كله .. فى الشهر كله اسبوع وااااااااااحد بس .. اسبوع يتيم .. لانها جايز تقضي بقيت الشهر في مارينا وده حقها طبعا .. تخيل تعمل كام في الاسبوع ده
بلهفة واضحة وترقب ) كااااااااام ؟؟ )
تعمل 1400 جنيه .. 1400 جندى .. ما اعتقدش ان مرتبك علي مرتبي علي مرتب عم الحاج اللي ادامنا ده و مركز معانا اوي يعمل المبلغ ده .. وطبعا مرتبنا ده في الشهر مش في الاسبوع .. وكل ده كان

minimum

بس ياباشا .. يعني الست دى لو اشتغلت اسبوعين يبقي معاها 2800 جنيه .. ولو ضغطت علي نفسها و خلتهم تلت اسابيع يبقوا 4200 .. كل ده و برضه

minimum
بذهول شديد ) هااااااااااا ؟ )
بذمتك مش لازم تلاقي إقبال علي المهنة دى .. وكمان يتفننوا انهم يلاقوا طرق مختلفة .. زي انها تشيل عيل وتقول مش عارف عنده أيه ؟ .. او تطلع مظبطة الشحاتة علي الوضع سيلنت متتكلمش ولا كلمة ولكن تعدي عليك تديك ورقة كده صغيرة مكتوب فيها أنا احب أمي .. أنا أحب أبي .. والدرس بتاع ابتدائي اللي أنت عارفه ده .. وناقص كمان يكتبوا شرارة والسلسلة .. وهيا ورقة يتمية بيبدلوها مع بعض .. صدقت ياعم انهم أغني منك .. والله أنا ساعات بحس انهم تبع الحكومة .. الحكومة اللي حريفة انها تطلع القرش من جيبك بأي شكل

بالطبع لا أخفي عنكم .. أن الراجل اتصدم .. وكان ناقص تجيله نوبة صرع .. ويظهر أن الرقم الكبير ده عمله تربنة فى دماغه
ده غير أن كل المتابعين للحوار .. مبلمين وعيونهم هتقفز من محاجرها

أما أنا
فقد سرحت قليلااااااااااااً

-----------------------------------------------

الرسم الكاريكاتورى المرفق

بريشة أخى وصديقى الفنان : عبد الرحمن أبو بكر

طبعا أنا باعتذر لكل زملائى المدونين عن طول فترة غيابى وعن تقصيري وعن انقطاعي طول المدة دي وباعتذر كمان عن اني ماقولتش اي اسباب لانقطاعي الطويل دا .. بس الأكيد أنه كان في اسباب وكانت أقوي مني كمان .. بس أنا مش حابب اتكلم عن الأسباب دى دلوقتى .. وكفاية انى اقولكم ان كلكم وحشتونى واتمنى اننا نرجع نتواصل كلنا زى الأول .. لأنى مش بس كنت مفتقدكم انتوا شخصيا .. لا كمان كنت مفتقد التدوين اللي هوا اصبح جزء من حياتي

مجلة الحقـــنة

أشادت جريدة الدستور فى عددها الأسبوعى اليوم 12/3 بمشروعات تخرج دفعتنا .. و حظى مشروعنا ( مجلة الحقنة ) بإشادة خاصة من جريدة الدستور .. وجاء فيما يخص مشروعنا مايلى

أما المشروع التالى فأتى تحت عنوان الحقنة .. وهى مطبوعة ساخرة تعيد ذكرى مجلة البعكوكة خالدة الأثر ، ولكنها تتميز عنها بعناصر رشاقة الموضوعات وخفة الأسلوب . ولم ينس فيها الطلاب السخرية من واقعهم التعليمى ، فقدموا استطلاعا حول الشخصيات المكروهة بين فئة الشباب وحمل عنوان ( مخنوق من مين فى مصر ) ، وضع الطلاب مجموعة من الصور التى كتبت تحتها تعليقات وكانت أول صورة لوزير التعليم العالى هانى هلال الذى كتبوا تحت صورته " مش عاوزينك " بالإضافة لموضوعات تسخر من التنسيق ومن التعليم المميز

الغلاف بريشة الفنان : عبد الرحمن أبو بكر

عدت بحمد الله

الخميس 7/2 الساعة 8 مساءا

هذا التاريخ اصبح من الأشياء التى لا تنسى وفى الثامنة مساءا تحديدا ، على الأقل بالنسبة لى وبالنسبة لـ 1500 طالب غيرى .. لأن هذا اليوم هو الذى شهد إنتهاء فترة التربية العسكرية بنجاح والحمد لله
اصبح من الأن يمكننى أن أعود انسانا طبيعيا .. انسانا ينام عدد ساعاته طبيعية ..انسانا يقوم بأعمال أخرى فى المنزل غير الأكل والنوم فقط .. انسانا يستطيع أن ينفض التراب من على الكمبيوتر الذى اصبح عشا للعناكب بعد غياب دام مايقرب من 3 أشهر متواصلة .. كان الشهر الأول منهم هو ماقبل الامتحانات .. ولأنى من النوعية التى لا تذاكر الا فى الأواخر فكان شهرا بمثابة محاولة انقاذ مايمكن انقاذه ، هذا بغير عملنا فى مشروع التخرج خلال هذا الشهر
أما الشهر الثانى فكان شهر الامتحانات .. والحمد لله مرت الامتحانات بسلام ، وما أن انتهت الامتحانات حتى بدأنا فى التنفيذ الفنى لمشروع التخرج حتى نلحق بموعد التسليم النهائي ووسط كل هذا ، كان علىَ أن اقضى فترة التربية العسكرية لأنها فرصتى الأخيرة ، 14 يوم لا يكفيهم 14 يوم لأحكى عنهم ، وبالرغم معاناتنا جميعا خلال الـ 14 يوما الا أننى لا ننكر اننا تعلمنا اشياء كثيرة .. ولعل معرفتى لأصدقاء جدد هى أجمل ما فى هذه الفترة

أنا ومجموعتى فى التربية العسكرية .. بذمتكم مش ننفع جنود فى الصاعقة

أوعى حد يفتكر أن الصورة دى على الحدود ولا حاجة .. لا دى جوه الجامعة برضه

--------------------------------------------------------------

أخيرا

وبعد كل دا رجعت لمدونتى ولكل اصدقائى المدونين اللى واحشونى بجد والله .. كلهم بلا استثناء واحشونى ومش هأقدر أقول أسمائهم لأنهم بقوا كتير بفضل الله تعالى .. ورجعت ولقيت اكتر حاجة فرحتنى .. لقيت ناس بتسأل عنى وبتسأل عن غيابى .. ناس بتسأل وهيا واثقة أنى جايز ما أكونش بأدخل البلوج من أساسه وبجد أنا بأشكر الناس دى شكر خاص جدا جدا .. وبأعتذر برضه جدا أنى ما لقتش فرصة اكتب فيها حتى سبب غيابى

وحتى الناس اللى ماسألتش عنى برضه بأشكرهم جدا لأنى بجد عاذرهم .. ولو كان عذرهم الوحيد أنى قصرت معاهم وماسألتش عنهم فدا يبقى عذر كافى جدا وعشان كده بأعتذرلهم عن تقصيرى الشديد دا

وعن خططى دلوقتى .. فأكيد أنا راجع وكلى شوق للكتابة وللتدوين وللتأليف ولكل حاجة بأحبها وانقطعت عنها الفترة اللى فاتت .. بس قبل أى حاجة لازم أخلص اللى عليا .. فقبل أى حاجة ان شاء الله هأزور كل حبايبى المدونين .. وهأرد على كل تعليقاتهم السابقة اللي ماردتش عليها .. وهأكمل الجزء الثالث والأخير من اليوم الثانى اللى ولا ع البال عشان يبقى بكده ابقى خلصت اللى عليا

وتحياتى ليكم كلكم

أخيرا .. ظهر القرطاس للنور

أنا جاى النهارده فى السريع كده عشان اقولكم كذا حاجة .. جاى اولا عشان اقدم تهنئة وثانياعشان اقول وحشتونى

الف مبروك

اهنئ صديقى الأستاذ / أشرف حمدى بمناسبة صدور العدد الزيرو من مجلة القرطاس

الأستاذ أشرف رئيس تحرير مجلة القرطاس اللي بجد تعب فيها جدا جدا عشان تظهر بهذا الشكل المشرف

وعايز برضه اهنئ كل المشاركين في المجلة

وكمان اهنئ نفسى انى كنت أحد هؤلاء المشاركين

وكمان اهنئ كل المدونين حبايبى اللي بجد وحشونى اوى

دا لينك مدونة القرطاس .. ومن هناك حملوا العدد الزيرو وهناك برضه هنتستنى ارائكم وملاحظاتكم وتعليقاتكم

http://elkortas.blogspot.com/

المرة دى فى السريع كده لكن مرة تانية هاكلمكم عن مجلة القرطاس بأستفاضة وعن شعورى تجاهها وعن العمل مع صديقى أشرف حمدى المجتهد جدا

إلى حبايبى المدونين

بجد بجد كلكم وحشتونى .. اللي نسينى خلاص .. واللى لسه فاكرنى .. وحشتونى كلكم

أنا عارف أنى غيابى طال .. وأن تقصيرى زاد .. ولكن الأكيد أن ليا عذرى

ولكن خلاص هانت .. الامتحانات على الأبواب .. وكمان تسليم مشروع التخرج سبب معاناتنا قرب خلاص

لكن والله عمرى مانسيتكم خالص .. ولا نسيت أى صديق مدون

أشكر جدا كل اللى سألوا عنى فى غيابى وفى مرضى

وربنا معاكم كلكم فى امتحاناتكم .. ويجعل الامتحانات بردا وسلاما علينا كلنا

أعتذر أيضا عن عدم أكمالى للجزء الثالث والأخير من ثان الأيام التى ولا على البال

وأن شاء الله هأكمله أول ماأرجع من الدوامة دى

أخيرا بقى

ياريت مايكونش فى أى حد زعلان منى بسبب تقصيرى وتأخيرى

وأتعشم أن يعذرنى الجميع

يومٌ أخر ولا على البال .. ج2

راجع الجزء الأول

بالطبع لم أتسمر من المفأجاة أكثر من جزء من الثانية وألا لكنت أصبحت الأن

فى طي النسيان

وفى هذه اللحظة رأيتها

رأيتها من المسافة البعيدة القريبة جدا

ركزت عليها

هى هدفى

وبعد ان كنت محتاج لفرامل كى اتوقف .. الأن اصبحت المجازفة ذاتها هى ان أتوقف

من الجنون أن احاول أن أتوقف

أو حتى أن أخفض من سرعتى

على العكس يجب أن أسرع .. أسرع جدا

ذلك لأنى رأيتها

-------------------------------------------------------------------------------------------------

كان هذا الشارع مظلم

بدت نهايته غامضة

نظرا لقلة الإضاءة به

هذا غير أنه ليس مستقيما تماما

ففى نصفه انحرافة بسيطة جهة اليسار

وحينما اقتربت من هذه الانحرافة

انكشف المشهد .. أخر مشهد اتمنى رؤيته الأن

زادت دقات قلبى عندما وقعت عينى عليه

حينها تذكرت البطاقة التى ليست معى .. ورغم أننى لم اكن اتخوف حينما اعطيتها للرجل

الا ان القلق يغمرنى الأن .. ماذا أفعل الأن ؟

ليتنى لم أفرط فى بطاقتى الشخصية

ولكن

لم تكن هذه المشكلة الكبرى

بل المصيبة الكبرى .. هو ماحدث

المصيبة الكبرى هى ماحدث ولم يخطر على عقلى شخصيا

حتى أننا لا اعلم حتى الأن كيف نجوت من هذا الموقف

ماحدث .... هو

-------------------------------------------------------------------------------------------------

رأيتها

رأيت تلك المسافة الفاصلة بين السيارتين

ان كنت ضليع فى تقدير المسافات .. لعلمت ان المتر لن يكون وحدة قياس لتلك المسافة

ورغم انها تقدر بما يقرب من 60 سم

الا انها تقدر فى مثل هذه المواقف ب60 ميكرو انتحار

وبقوة ضغطت على البدال حتى زادت سرعتى .. وضعت المسافة الفاصلة بين السيارتين نصب عينى

وكأنها ممر النجاة الأخير

التقط نفسا عميقا .. اركز بعينى كالصقر الذى يتأهب للأنقضاض على فريسته

وجاءت

جاءت اللحظة

-------------------------------------------------------------------------------------------------

انكشف المشهد

تمنيت ان يكون ماأراه امامى حلما

لم يكن متاحا وقتا للتراجع

التراجع .. يجعلنى مشكوكا فى أمرى

فقد كنت امامهما تماما

على اليمين امامي مباشرة سيارة شرطة بوكس

وعلى اليسار سيارة ميكروباص تابعة لهم

لمن لم يعلم ظاهرة ميكروباص الشرطة هذه .. فهى ظاهرة ليست بجديدة .. وهى أن تتأخذ الشرطة ميكروباصا للتخفى فيه ويلفون فى الشوارع

ويملئون الميكروباص بشباب النواصى وكل من يشتبه فى أمره

ويأتى من خلفه بمسافة كبيرة بوكس الشرطة .. حتى لا يراه احد

المشهد تفصيليا كالتالى

مجموعة من الشباب يقفون فى صف واحد ومجموعة من امناء الشرطة يفتشونهم

مجموعة من الشباب تم اختيارهم لكى توصلهم الشرطة مجانا إلي القسم بميكروباصهم الموقر

كبيرهم لا اعلم رتبته .. ولكنه جالس فى البوكس يتابع المشهد بسعادة بالغة

مجموعة اخيرة

مجموعة انتبهت إلي ذلك الضيف الجديد الذى اقتحم البلاتوه مزعجا

ذلك الضيف .. كان أنا

-------------------------------------------------------------------------------------------------

ان كنت لعبت لعبة بيبسي مان على البلاى استيشن

لوفرت علىّ عناء وصف ماحدث لىّ عندما مررت من المسافة الفاصلة بين السيارتين

كنت كالذى يقف بين بندولين (بندول الساعة) وكل منهما يلقفه للأخر

تِك تًَََك تِك تًك تِك تًك

ارتطم بجانب هذه السيارة فيتلقفنى جانب السيارة الأخرى ثم يعيدنا إلى السيارة الاولى وهكذا

حمدا لله مررت بسلام

وقفت بدراجتى وسط الطريق بعدما اخفضت مجموعة الارتطامات هذه سرعتى تماما

انظر إلي الارض .. الهث محاولا التقاط انفاسى بصعوبة .. العرق يتصبب على جبينى

انتبه إلي اننى عطلت الشار ع نهائيا

انتبه على

بيييييييييييييييب تيييييييييييييت اركن يابنى يا أبو عجلة على جمب تييييييييييييييت بيييييييييييييييييييب

كنت قد قطعت اكثر من نصف المسافة .. ومن الصعب ان اعود إلى محل تأجير الدراجات لاستبدلها بواحدة سليمة الفرامل

ورغم ان مازال امامى طرق سريعة الا اننى قررت ان لا اعود .. وساستكمل بدون فرامل

على ان استخدم الفرامل الكلاسيكية المعروفة فى مثل هذه المواقف

ولمن لا يعرفها

فهى بأن تنزل قدمك إلى الأرض ومع احتكاك قدمك مع الارض تنخفض سرعتك حتى تتوقف

مصدرا هذا الاحتكاك صوت

تششششششششششششششششششششششش

هى بالطبع ليست امانا .. لان الدراجة لن تقف بمجرد ان تلامس قدمك الارض

استكملت طريقى محاولا أن اقنع نفسى ان مازالت الرحلة ممتعة

إلي ان جاء ماهو كفيل بأن يجعل هذه المتعة تزول نهائيا

وذلك حينما اخترت احد الشوارع المغمورة كنوع من الاختصار

وانكشف المشهد مع انحرافة ذلك الشارع المظلم

لأرى البوكس يقف على اليمين ومقدمته ناحيتى

وميكروباص الشرطة على اليسار ومؤخرته ناحيتى

يبو ان كلا منهما اختارا ان يدخل هذه الشارع من اتجاهين متقابلين

البوكس دخل من اخر الشارع

والميكروباص دخل من اوله .. حتي يحكموا الحصار فى منتصفه

-------------------------------------------------------------------------------------------------

كل ماحدث .. حدث فى ثانية واحدة

الجزء الاول من الثانية

اتحسرعلى تفريطى فى بطاقتى الشخصية

وشعور ينتابنى بأنهم لن يأخذوا بكارنيه الجامعة كنوع من ( تلاكيكهم ) المعهودة

فلن يشغله ان كنت طالبا جامعيا .. ولن يشغله حتى جملة ( إعلام شعبة صحافة ) التى تتوسط الكارنيه

أمناء الشرطة هؤلاء ينصبون من أنفسهم لواءات ويتخيلون ان لهم من السلطة

مايجعلهم يفعلون مايريدون

ان كانت معى البطاقة لكنت اقتحمت المشهد بثقة كبيرة

فاتحا صدرى .. مطمئنا

حتى وأن أخذونى .. فأنا على حق .. سأتكلم بثقة ومن غير قلق

ولكن افتقادى لبطاقتى الأن هو مايقلقنى .. بطاقتى التى ربما يعتقد ( العجلاتى ) انها احدى كروت الفيزا ويعبث بها فى احدى ماكينات (ميناتل) معتقدا ان ثروة ستنهال عليه

استقريت على أنه ان حدث ذلك .. سألجا إلي كبيرهم الذى اعتقد الأن أنه برتبة رائد .. وهو بالتأكيد سيتفهم الأمر بعد أن يرى كارنيه الجامعة واثباتات الشخصية الأخرى

كل هذا دار فى خلدى فى جزء من الثانية وأنا أقود الدراجة بالطبع

اما ماحدث فى الجزء الأخر من الثانية فهو المصيبة الكبرى ذاتها

ماحدث هو ماسيجعل البركان الخامل يثور فى لحظة واحدة

كنت اسير بسرعة متوسطة .. وفجأة ودون سابق أنذار ظهرت من المنتصف سيارة ملاكى .. ظهرت من المسافة بين البوكس والميكروباص

تلك المسافة التى كان من المقرر ان اعبر منها سالما .. هذا أن لم يكن سيستوقفنى احدا بالطبع

وكأن السيارة الملاكى هذه ظهرت من اللامكان

تمنيت كم لو كانت مجرد اسكوتر .. حتى اجد حيز أمر منه بجوارها

الأن

سأنحرف جهة ميكروباص الشرطة حتى لا اصتدم بتلك السيارة

وحينما انحرفت جهته

بدأت اخفض قدمى لتحتك بالارض .. منتظرا سماع تششششششششش .. ومن ثم تنخفض سرعتى واتوقف

ولكن

وكأن الارض هبطت بضعة سنتيمترات من تحتى

فلن تطولها قدمى

وبمنتهى القوة

اصتدمت دراجتى بمؤخرة ميكروباص الشرطة امام أعين الجميع

ابتسم .. انت رهن الأعتقال

صوت الاصتدام كان كفيلا بأن ينبه المباحث الفيدرالية بأمريكا ذاتها

طاااااااااااااااااااااااااااااااااااااااااااااخ

To be continued

SMS

اعتذر جدا جدا عن تقصيرى الشديد هذه الفترة مع كثير من اصدقائى المدونين ، نظرا لظروف الدراسة وقرب موعد تسليم مشروع التخرج ، وارجو ان لا يغضب منى احد بسبب قلة زياراته له ، وأن يعذرنى

كما اعتذر عن تأخيرى فى التدوين نظرا لنفس الاسباب

اود ان اشكر من يسأل عنى على الرغم من تقصيرى هذا ، وأشكر ايضا من عاذرنى ، وأشكر حتى من لم يعذرنى وأتعشم ان يعذرنى

اعتذار خاص لصديقتى العزيزة ماعلينا على يستكمل

ومعلش ياماعلينا ماكنش ينفع اطول اكتر من كده فى البوست

وبرضه هانتظر تعليقك

ودعواتكم بقى ياجماعة

يومٌ أخر .. ولا على البال

يرتبط فى أذهاننا ان من يتسمر من المفأجاة .. يظل ثابتا لا يتحرك حتى تذول دهشته
ولكن السؤال متى تتسمر من المفاجأة ورغم ذلك أنت مازالت غير ثابت حركيا؟
تعلم متى يحدث هذا؟
يحدث هذا فقط ان كنت تسمرت من المفأجاة وأنت اساسا على جسم متحرك يسير بسرعة كبيرة

صُعقت حينما وجدتهما أمامى مباشرة .. يسيران بمحاذاة بعضهما تماما .. وعن يمينى الرصيف وعن يسارى الصف المركون
بيييييييب ... بييييييييييب
اتجهت يدى سريعا إلى الفرامل الخلفية .. وضغطت بشدة .. وكانت المفأجاة
اتجهت يدى سريعا إلي الفرامل الأمامية .. رغم أنه يُحذر استخدام الأمامية فى مثل هذه المواقف حتى لا انقلب .. ولكنى ضغطت بحذر .. وكانت مفأجاة أكبر
بييييييييييييييب
الأن لامفر من الاصتـــــــ
ولكن ماهذا .. هذه ليست البداية .. ماذا أتي بى إلي هذا المشهد السينمائي .. اذن فلنعود إلي البداية

الجمعة 11 / 2

أسبوع شاق ذلك الذى مررت به .. جعلنى أنتظر يوم الجمعة بشغف كبير .. وعندما جاء يوم الجمعة وجلست فى المنزل .. وجدت أن حالة من الملل الرهيب تنتابنى .. كان من المفترض أن أنعم بالنوم لعدة ساعات من بعد صلاة الجمعة .. ولكن حتى النوم خذلنى .. اشعر بجو المنزل يخنقنى بشدة .. اقضى الساعات ذهابا وإيابا بين الغرف .. تارة اجلس على الكمبيوتر وأقوم بعد دقيقة واحدة دون أن أفعل شئ .. وتارة أمسك ريموت التلفاز ثم انحيه جانبا دون أن استقر على شئ .. وتارة أمسك كتاب فاقرأ منه الغلاف فقط الذى قرأته مئات المرات ثم اتركه
كل هذا جعلنى ابحث بشدة عن شئ جديد لأفعله .. ولكن ماهو؟ .. أخيرا يبدو أن هذا الشئ الجديد سيكون النوم .. سأحاول النوم مرة ثانية .. وفى طريقى إلى النوم .. جاءنى صوت أمى
أحمد .. مش هتروح تدفع فلوس النت وأنت فاضى كده
كنت قد نسيت تماما ميعاد تجديد الاشتراك الشهرى للنت .. أرتديت ملابسى .. وفجأة انتابتنى حالة الملل من جديد
وكأن الملل يخاطبنى قائلا
ياااا .. برضه هتروح الشركة بالطريقة المملة بتاعت كل شهر .. تركب ميكروباص تنزل منه تركب التانى .. وتمشى شوية لغاية الشركة .. دا أيه الملل ده ؟

فكرة

لا أعلم لماذا هذه الفكرة تحديدا .. ولكنى رأيت انها هى الشئ الجديد الذى أفعله ويخرجنى من هذا الملل .. غادرت المنزل ، بعد أن اطمأنيت إلى أنه معى مايزيد عن حاجتى من الفلوس .. فقد تعلمت الدرس جيدا من

يومى الذى ولا على البال السابق .. غادرت وأنا مقرر أن أذهب إلى الشركة اليوم بدراجة
يبعد مقر الشركة عن منزلنا بحوالى محطتين وتحديدا يقع فى حى المعادى .. بما يستغرق نصف ساعة للذهاب إليه
وقبل أن أخرج من شارعى قابلت محمود صديقى .. وبعد أن سلمت عليه

ماتعرفش والنبى ياحودة حد هنا ممكن آجر منه عجلة
ليييه ياعم أنتا داخل سبق ولا أيه؟
لا اصلى رايح ادفع اشتراك النت .. وبينى بينك طقت فى دماغى أنى اروح بعجلة
هتروح لغاية المعادى بعجلة؟
ياعم بسيطة . . أهو تجديد
طيب بص هتخرج من شارعنا هتمشى شمال هتلاقى واحد على ايدك الليمين
يااااا .. تصدق ياحودة كنت فاكر ان الراجل ده غير نشاطه .. شكرا ياباشا
بقولك ياأحمد صحيح قولى ايه رأيك فى الصور دى .. اتصورتها امبارح
لا جميلة ياحودة .. تصدق أنا كمان عايز اتصور من اسبوع وكل يوم أنسى .. بقولك ايه ياحودة ماتدينى رنة بعد ساعة كده اكون رجعت وافتكر برنتك دى أنى اروح اتصور .. ماشى ؟؟
ماشى ياحج .. يالا روح انتا وخد بالك من الطريق .. سلام
سلام

دخلت على الراجل صاحب محل تأجير الدراجات

سلام عليكم .. والنبى ياباشا عايز أجر عجلة
امممم .. طيب بطاقتك الشخصية بعد أذنك

مددت يدى ببطاقتى .. كنت اعلم انه سيطلبها .. لم يقلقني هذا .. فمعى فى محفظتى مالايقل عن 4 اثباتات للشخصية

بص أنا رايح أقضى بالعجلة مشوار .. مش رايح العب بيها ولا أخد لفة .. يعني شوفلى واحدة محترمة عشان ولا تعطل منى ولا جنزير يقع تبقي مشكلة
طيب خد الاولي اللي هناك دى هتعجبك

أما عن مهارتى فى قيادة الدراجات .. فلا غبار عليها
يكفيك أن تعلم أننى لم أقد دراجة من 10 سنوات باستثناء تلك المرات الغير كاملة فى رحلات القناطر وغيرها من الرحلات
ويكفيك أن تعلم اننى قد فرطت فى دراجتى الشخصية وأنا مازلت فى العاشرة من عمرى .. لأننى وجدت أنه لا مفر من حصولى على المركز الأخير فى سباقات اطفال منطقتنا
أما الأن فالوضع مختلف .. وها أنا الأن محترف فى الـــــ
ركبت الدراجة سريعا .. اختل توازنى فى البداية .. ثم استقر الأمر .. بدأت المتعة تغمرنى .. كم اعشق قيادة الدراجات .. مازلت بسرعة متواضعة .. لم أبغى أن ازيد من سرعتى الأن .. الطريق السريع امامى .. ثانية وأصل إليه

بداية القصيدة

بمجرد خروجى إلى الطريق السريع .. فوجئت بسيارة مسرعة أتية .. انحرفت بقوة جهة اليسار .. وفى انحرافى المفاجئ اصتدمت مؤخرة دراجتى بمقدمة دراجة شخص خلفى .. الصدمة جعلت دراجته تسقط ارضا .. ولكن هو لم يسقط والحمد لله
وجدت أنه ليس من أخلاقى أن انطلق مسرعا وأتركه خلفى .. لذلك وقفت على جانب الطريق أنتظره متوقعا سيل من السباب
ولكنه أتى متسامحا مبتسما .. أعتذرت له .. واكملت طريقى
لن يعكر ذلك متعة رحلتى .. استخرج خريطة المنطقة من عقلى كى ابحث عن اختصارات فلن أسير فى هذا الطريق التقليدى
كان يتحتم علىّ أن اعبر إلى الاتجاه المعاكس وأسير فيه مايقرب من 15 متر .. حتى أخذ شارعا على اليمين

المفأجاة

وبمجرد دخولى إلى الطريق المعاكس .. فوجئت أمامى مباشرة بسيارتين يسيران بمحاذاة بعضهما .. أنا فى المواجهة تماما .. يسارا الرصيف .. ويمينا صف من السيارات المركونة
ااااااه .. مشكلة .. الأن يتحتم علىّ الوقوف نهائيا والانحراف نحو السيارات المركونة
كل هذا فى جزء من الثانية .. كانت سرعتى أعلى من المتوسطة قليلا .. اتجهت يدى نحو فرامل الخلف سريعا .. وبدأت فى الضغط
ااااااااااااخ
الفرامل الخلفية لا تعمل .. اضغط مرة ثانية .. لا فائدة
بيييييييييييييييييييييييب
يبدو أن الاصتدام أتى لا محالة
أنظر إلي عجلات السيارتين .. فأجدهم ينهشون المسافة الفاصلة بنهم شديد
بيييييييييييييييييييييييييييب
وليكن ساستخدم الفرامل الامامية بحذر .. اضغط
وبدلا من ان تقف الدراجة .. اسمع صوتا من عقلى يقول
ابتسم .. أنت تقود دراجة بدون فرامل
وصوتا أخر يقول .. اختر من بين الاقواس .. تفضل الاصتدام بـــ
الرصيف
ولا صف السيارات المركونة
ولا احدى السيارتين المتحركتين
بييييييييييييييييب

اخيرا يقرر عقلى أن ينحى هذه الاصوات جانبا .. ويذهب ليقطع تذكرة يدخل بها السينما
ويشاهد ممدوع عبد العليم .. ويجعلنى أتذكر مشهدا واحدا .. مشهدا يقول

ياسنة سوخة ياولاد
مابيعرفش يوجفهااااا .. مابيعرف يوجفهااااا

to be continued

الجزء الثانى

الجزء الثالث والأخير

قريبا جدا

ترقبوا قريبا جدا
يومٌ أخر .. ولا على البال

اتذكرون يومى الأول
يوم ولا على البال

من لم يقرأه .. فليقرأه ليعلم أنى قد شارفت على استصدار موسوعة أيامى التى ولا على البال
أما يومى الجديد هذا فهو كان يوم الجمعة الماضي 2 / 11 .. ولكنى لم استطع تدوينه فى لحظتها

وقريبا جدا سأسرد تفاصليله .. ومن هنا حتى لقاءنا هذا
أن صادف احدكم أحدى هذه العناوين تحتل مانشيتات الصحف فلا يستعجب

تسببت دراجة مجنونة يقودها سائق أخرق فى أثارة الشغب فى شوارع حى المعادى

دراجة هاربة من أفلام الماتريكس جعلت من ميادين المعادى قطعة من الجحيم

سائق دراجة يتسبب فى تعطيل حركة المرور فى بعض الطرق السريعة فى المعادى

من يدلى بمواصفات أو معلومات تساعد فى التعرف على سائق الدراجة له مكأفاة وقدرها علبة لبن حليب خالى من السيراميك و 5 أرغفة من الخبز الغير مسرطن

البقاء لله

انتقلت إلي رحمة الله المدونة
بهلولة

صاحبة مدونة بهلول وبهلولة

علمت الخبر صباحا من مدونة .. آلام وآمال

والخبر موجود ايضا في مدونة
بهلول

اللهم أغفر لها وارحمها وارزقها فسيح جناتك
اللهم اغفر لها وارحمها وعافها واعف عنها واكرم نزلها ووسع مدخلها واغسلها بالماء والثلج والبرد ونقها من الخطايا كما ينقى الثوب الابيض من الدنس وابدلها دار خيرا من دارها واهلا خيرا من اهلها وزوجا خيرا من زوجها وادخلها الجنه واعذها من عذاب القبر ومن عذاب النار
اللهم ارزق اهلها الصبر والسلوان

لا تنسوا الدعاء لها .. ولموتانا جميعا بالرحمة والمغفرة

الأمل و السراب

الأمل و السراب

نظر للمرة الأخيرة إلى المرآة ليتأكد من أناقته وتصفيفة شعره .. غادر منزله واتجه مباشرة نحو موقف الميكروباص .. لم يكن الحال أسوأ من ذى قبل فقد وجد الميكروباص واقفا ومازالت هناك اماكن شاغرة به .. ركب واختار المقعد الخلفى ليكون بعيدا عن احتكاكات الزحمة فى هذه الساعة من الصباح .. نظر إلي ساعته .. اطمئن إلى أنه بذلك لن يتأخر على موعد العمل
امتلئ الميكروباص الا من مقعد واحد
هنا
هنا وقعت عينه عليها .. كانت مفأجاة كبيرة بالنسبة له .. لم يكن يتوقع .. لم يضع احتمالا .. تخبطت مشاعره بقوة .. هل هو فرح برؤيتها؟ .. ام أنه يود لو لم يكن يحدث؟
انه يرأها من الشباك .. انها متجهة ناحيته .. انها متجهة ناحية نفس الميكروباص .. استقلت الميكروباص وجلست على المقعد الخالى خلف السائق مباشرة
عندما دخلت وملأ عطرها الميكروباص بالكامل .. سرت في جسده قشعريرة من أعلى رأسه وحتي قدمه .. ارتفعت حرارة جسمه .. من ينظر إليه فى هذه اللحظة يبدو له وكأنه يعانى نوبة مرضية
تحرك الميكروباص .. ماذا يفعل؟ .. بالتاكيد يجب أن لا يتركها تدفع لنفسها .. أنه لا يعلم حتي أن كانت علمت بوجوده .. لم يجد فى جيبه فكه .. أقل فئة ورقية معه خمسة جنيهات
اخرجها سريعا .. يديه ترتعش .. سقطت منه الخمسة جنيهات ارضا .. شعر من بجواره أنه مرتبكا متوترا .. مد يده لمن امامه .. وقال بصوت كان يرغب فى أن يكون مرتفع لكى تسمعه ولكنه فشل

خد اتـ .. اتنين ، وماتخليش الأنسة اللى اُدام تدفع

قالها متلعثما .. كل هذه الحالة التى انتابته من مجرد رؤيتها فقط .. وهذا كله لأنه مازال يحبها وسيظل يحبها .. مر امام عينيه شريط قصة حبهما الجميلة .. 3 سنوات من الحب الذى جمعهما .. بل 3 سنوات من العشق ، من الهيام .. تذكر كل هذا .. تذكر حتى كيف انتهت قصة الحب الجميلة .. لم يكن يرغب فى أن تنتهى ، ولا حتي هى كانت ترغب .. ولكنه ماحدث لقد كان هو السبب .. لقد ظلمها

وبعد مرور 3 سنوات على انتهاء قصتهما .. مازال يحبها .. حريص على أن يعرف اخبارها .. رغم أنه يتمنى لها الخير و السعادة من قرارة نفسه
الا أنه حينما يسأل عنها .. يرتجف لمجرد تخيله أن يسمع أن احدا تقدم لها .. يتنهد ويرتاح حينما يطمئن أنه لم يحدث
وذلك لأنه يتمنى أن تكون من نصيبه .. مازال يضع املاً ولو صغيراً أن يعودا لبعضهما
فاق على صوت السائق منبها أنه أخر الخط .. بدأ الركاب فى النزول .. نزلت ولم تستدر حتى إليه
اقترب من السائق سريعا .. يطلب منه باقى الخمسة جنيهات .. اعتذر له السائق عن نسيانه وأعطي له الباقى .. كان الباقي 4 جنيهات .. نظر إلي الباقى متعجبا

وقال للسائق
خد ياأسطى ده جنيه زيادة .. أنا كنت دفعلك اتنين من الخمسة
رد السائق
لا ياحضرت .. الأنسة اللى انت دفعتلها .. رفضت وقالت انها هتدفع لنفسها

كان لو تلقى طلقة من مسدس أو حتي قنبلة اهون عليه من هذا الرد
هوى قلبه ارضاً .. لو كان السائق دقق قليلاً في عينيه .. للاحظ تلك الدموع التى تزاحمت فى عينيه تتسابق على الانسيال
اشاح بوجهه بعيدا وحاول السيطرة على نفسه .. نزل من الميكروباص سريعا
ينظر فيما حوله باحثا عنها .. يمينا يسارا .. امامه خلفه .. لم يرأها .. عيناه تبحث فى كل مكان كالطفل الذى يبحث عن أمه بعد أن شعر بالضياع .. عيناه نقبت الميدان بالكامل

ولكنه لم يجدها .. لم يجدها

وكأنها فص ملح وداب
لم يجدها .. لم يجدها

وكأنها كانت سراب

انا لله وانا اليه راجعون

منذ قليل .. وأنا اتابع الجديد لبعض المدونين .. استوقفنى تعليق لأخى و صديقى شريف عبد الهادى فى أحدى المدونات .. يطلب من زوارها زيارة مدونته الخاصة وقراءة بوسته الأخير

وهذا هو نص تعليقه

فبركة said...

ألف رحمة ونور عليكى يا شيماء
اللهم أرحمها وأرحم كل موتى المسلمين
اللهم أرحمنا فوق الأرض وتحت الأرض ويوم العرض عليك
رجاء من الكل زيارة مدونتى وقراءة البوست الأخير
جزاكم الله خيرا

ذهبت إلي مدونته وأنا فرح بعودته إلى التدوين بعد غياب .. ولكنى كنت أتسائل من شيماء هذه

حتي قرأت البوست

وهذا هو لينك البوست

حبيتها بعد وفاتها

ومن لا يعرف عن شيماء يقرأ البوست السابق هذا .. ثم يدخل مدونتها

لن استطيع ان اصف مقدار الحزن الذى اصابنى على هذه الإنسانة .. سرى فى جسدى سيل من القشعريرات الماً عليها .. قبضة من فولاذ اعتصرت قلبى وأن أقرا هذا البوست .. كم صعب الفراق ؟ .. هاهو الموت بكل غموضه ينتزع إنسانة فى ريعان شبابها

رحمة الله عليكى ياشيماء

ومثلى مثل عشرات المدونين .. لم اعرفها الا بعد وفاتها .. ولكنى احسست بأنها من أقرب الأقربين إلى .. بل أختى ذاتها

وعندما دخلت إلي مدونتها

شيكو أونلاين

لم استطع أن امنع نفسى عن البكاء .. عشرات و عشرات من تعليقات العزاء و الدعاء لها بالرحمة و المغفرة

وأقسم .. بأنى احسست بالدموع في عيون كل الذين علقوا

والله لن تكون الدموع غالية عليكى أبدا ياشيماء

لقد تذكرت بأن غدا سيمر علي اهلها أول عيد .. وهى ليست بينهم

ولكن نسأل الله أن تقضى العيد فى فسيح جناته

ادعوا لها بالرحمة .. وأقراوا لها الفاتحة

اضم صوتى إلى صوتك ياشريف

حبيتها بعد وفاتها .. وحتي وأن كانت علي قيد الحياة كنا سنحبها

الله لا إله الا هو الحى القيوم .. وسعت رحمته كل شئ .. انما أمره أن اراد شئيا أن يقول له كن فيكون

هاهو الموت يأتى فلا يفرق بين طفل و شيخ .. لا يفرق بين سليم و مريض

هل كل ما افعله يؤهلنى ان استقبل هذا اليوم وأنا مطمئن .. وهل أنا جاهز للقاء ربى

وما دمت لا اعلم لحظتى

لما لا اكون جاهزا من الآن؟؟

اللهم اهدنا فيمن هديت .. وعافنا فيمن عافيت .. وتولنا فيمن توليت .. وقنا برحمتك واصرف عنا شر ما قضيت ..إنك تقضي ولا يقضى عليك .. إنه لا يذِلُّ من واليت .. ولا يعِزُّ من عاديت .. تباركت ربنا وتعاليت

اللهم ارزقنا الصلاح و الهداية

ووفقنا لما تحبه و ترضاه

ريشة فنان .... كلاكيت تانى مرة

صديقى و أخى الفنان الشاب رسام الكاريكاتير عبد الرحمن أبو بكر مازال يصر على أن يجرب فيا دائما .. أقصد يبدع فيا دائما

عم الأمور اللى فوق فى الرسمة .. ماهو الا العبد لله .. أنا يعنى
طبعا لما شوفتها أول مرة اندهشت .. لأنه رسمها من صورة كان صورهالى بالكاميرا قبل كده .. كنت واقف نفس الوقفة و لابس نفس الطقم وكنت فعلا مخفف شعرى كده كنوع من أنواع التنفيس برضه .. وعلى فكرة هو نزل الصورة فى مدونته فى التاج اللى أنا بعتهوله

فعلا عبد الرحمن ده كل مدى يثبتلى أنه فنان مش هين
ربنا يوفقك ياعبد الرحمن

ويجعل لك فى كل لوحة سلامة .. و يجعل لك فتحة اللوحة قدم السعد عليك
وما يوقعكش فى ألوان ميه لما الميه تكون قاطعة .. وما يدلقلكش بلتة ألوان على السرير
كل سنة وأنت طيب
كل سنة وكل أخواتى و أصدقائى المدونين طيبين

تحديث للبوست السابق

يبدو أن المدون مثلي أوى لم تصله رسالتى واضحة ، وظننت أن الموضوع قد أنتهى ، أما بعد التطورات التى حدثت ، فوجب أن أرد عليه ، وسأحاول بقدر الأمكان أن أتبع معه نفس أسلوبى السابق ، أما أن خالفته فهذا سيكون ذنبه و ليس ذنبى
قام المدون مثلى أوى بالإعتذار بعد الموضوع السابق

اضغط هنا لترى الإعتذار .. وقام بالإعتذار أيضا فى مدونة عالم إفتراضى .. أضغط هنا لترى الأعتذار

ولكن أتعتقد أننا نحن من يجب أن تعتذر إليهم .. بل يجب عليكم التوجه إلي ربنا عسى أن يشملك برحمته الواسعة

أما المفأجاة الكبرى فكانت كونه مسلما
ولك منى سؤال صغير
أن كنت أنت يامسلم قد أخطات فى دينك وأساءت إليه .. فماذا تركت لهولاء السويديين و الدنماركيين .. أذن فلا عتاب عليهم لأنهم لا يعلمون شيئا عن الإسلام

أما بخصوص ما قولته بأننى قسوت عليك
فعلى العكس تماما والله أنا أشفق عليك .. وكنت أتمنى مساعدتك .. ولكنك لن ترغب أن تتلقاها
أتعلم لماذا
لأنك أساسا مقتنع بأن ما تفعلوه حقا من حقوقكم .. ولن تقتنع بأنك مريضا
وما يزيد على ذلك
أنك مؤمن بأنك على حق .. وأن دين الإسلام دينا ظالما لأنه لم يقر بحقوقكم
وأن كان ذلك فلن يكن الإسلام فقط و ستكون كافة الأديان السماوية .. لأن كل الأديان السماوية حرمت ما تفعلوه

نيجى بقى للجزء التانى

ياعم مثلي أوى أنا مطلبتش منك أنك تحول من مدونتى فرع من فروع الويكيبديا أو مرجع عن المثلية .. دا غير أنك أساسا دخلت فى شارع مسدود .. شكلك متعرفش أنى كنت علمى علوم فى الثانوية العامة .. ولكن أن هأترك الرد العلمى ده للى أجدر منى بالحكاية ده
وأنا شايف أن أحسن رد فى النقطة دى رد المدون حزين فى مدونتك
أضغط هنا لترى الرد
وكمان رد الوسواس المصرى فى مدونتك وفى مدونته
اضغط هنا لتري الرد فى مدونة مثلى
اضغط هنا لترى الرد فى مدونة الوسواس المصرى

وأرجوك مشكورا .. لك مدونتك الخاصة أكتب فيها زي ما أنت عايز .. وبلاش تستخدم أسلوبك الدعائى ده .. رغم أنى عارف أنك حتى لو عملت مليون مدونة و فضلت تتكلم من هنا للسنة الضوئية الجاية .. لن تغير من الحقيقة شيئا .. الحقيقة اللي أنتوا متأكدين منها .. بس للأسف بتتعاموا عنها
حتى الآن لم امسح تعليق واحد من تعليقاتك .. لأن ذلك أتخذته مبدء من البداية بموجب احترام أراء الأخرين و الحرية فى ابداء أراءهم .. تلك الحرية التى لن تكون مطلقة أبدا .. ولابد من قيود تحكمها
لا تجعلنى أخالف مبدئي هذا وأقم بمسح تعليقاتك .. ولا أعتقد أن أصدقائى المدونين سيلوموننى على ذلك
وحتى أسلوبك فى محاولتك كسب أصدقاء أسلوب دعائي
وفى مقدورى أن أتي لك بعشرات التعليقات منك عند مجموعة من المدونين .. نفس التعليق .. صور من أصل
بداية من هاى أزيك أنا مثلى أوى ..... وحتي سورى نسيت أقولك حاجة ... إلى أخره

يبدو أنك تهوى لعبة كوبى و بست

نصيحة هامة
تأكد أن الله من عظمته لم يحرم شيئا من فراغ ، أعطي لنفسك الفرصة لتبحث لماذا حرم الله ما تفعلوه .. أنك تحتاج لإعمال عقلك
وعن إدعائك بأن منكم من ينتحرون بسسب نبذنا لهم .. ياعم أبقو ا اعملوا اللي أنتوا عايزينه طالما هتبقوا بعيد عنا .. ولكن هيظل الله مطلع عليكم

أخيرا

زى ما أنت حر في أنك تعمل اللي أنت عاوزه و تقتنع باللي أنت عاوزه
فأصدقائي المدونين لهم كامل الحرية فى التعبير عن رفضهم لك ولما تقوله
أما أنك تتطاول عليهم فلا اسمحلك ولا أقبل منك ذلك .. وذلك أن دل على شئ دل على المزيد من ضعفك
وعن قولك

أنك مش هترد عليهم عشان متنزلش للمستوي ده
فخلينى اقولك أنك واهم .. لأن العكس صحيح

والظاهر أنك لسه مش مقتنع أنى لن أرحب بك صديقا
وبخصوص حكاية أن عينى عجباك .... فـــــــــلا تعليـــــــــق

أصدقائي و أخواني المدونين
أعتذر جدا لكم ، أن كان أساء لأحدا منكم
وأن كنت أخطأت فى أنى أديته الفرصة أنه يبرتع في المدونة .. فده غصب عنى لأنى كنت مشغول اليومين اللي فاته
ولكن خلاص أعتبروها صفحة و انطويت بأذن الله

ولازم تعرفوا أن المدونة دى بتاعتكم زى ماهى بتاعتى
أعتذر لكم مرة أخرى

اللهم اهدينى لما تحبه و ترضاه دائما

حسبى الله ونعم الوكيل

إلى المدون
mthlykaweyy

لن اتطرق هنا لكونه مثليا أو للمثلية من أساسه
فهذا شئ يرجع له
و أى فرد فى هذا العالم مسئول عن كامل أفعاله
سواء كانت صحيحة أم خاطئة
وليعلم جيدا أنه سيكون مسئولا عن أفعاله هذه
في يوم لقاء عظيم

ولكنـه قـام بزيـارة مــدونتـى بالأمــس و قـام بالتـعلـيق فــى موضـوعى السـابـق .. ( اضغط هنا لترى التعليق ) وكنت للحظة الأخيرة قد نويت أن أرد على تعليقه ردا لائـقا .. ردا يحمل من الترحاب ما يرضينى

و لكنى قد رأيت تعليقه فى مدونة عالم إفتراضى على بوسته الأخير بها بخصوص المدعو محمد حجازى .. ( اضغط هنا لترى التعليق ) وأنا هنا لست بصدد أن أنتقد محمد حجازى أو اهاجمه
فهو مسئول عن أفعاله

وليعلم الجميع أن هناك مبدأ راسخ من مبادئي ينص على أحترامى
لكافة الأديان السموية وينص على أن
الدين لله و الوطن للجميع

ولكنى هنا بصدد أن أذكره بتعليقه هذا .. تعليقه فى مدونة عالم إفتراضى .. أتذكره .. وأن كنت نسيته فأنا لن أنساه

التعليق الذى قولت فيه أن الإسلام دين ظالم و إرهابى
أتذكر
والذى قولت فيه أن الإسلام دين لا تحترمه و أنه دين المعاقين ذهنيا
أتذكر

لن أهاجمك ولن اتطاول عليك بالكلمات
أتعلم لماذا لأنك لا تستحق

ماذا تعلم أنت عن دين الإسلام؟

هل هذا هو ماذكرته في تعليقك عندى بأنكم ناس كويسة أوى وأن الناس هى اللى ظلماكوا وأن أنتوا اللى مظلومين
يبدو أنك توهمت بأنى لن أعثر علي تعليقك هذا

كنت قد طلبت منى فى تعليقك أن نكون أصدقاء
ولكنك دفعتنى دفعا

أعذرنى

لا أرحب بك صديقا ولا ترحب بك مدونتى صديقا أو حتى زائرا

وعلي فكرة
أنا أفخر بأنى على ذلك الدين الذى قولت عليه أنه ظالما
أنا أفخر بأنى على دين الإسلام

تاج فى عز الصيام

التاج الجميل ده بعتتهولى
الأخت العزيزة الدكتورة روفى
دا بدل متبعتلى كوبية خُشاف أشربها بعد الفطار ، أو بلاش الفطار .. كانت بعتتلى طبق فول بالزيت الحار أتسحر بيه حتي
يالا بقى .. ماعلينا
وفي حاجتين عايز أقولهملك يادكتورة روفى
أولا : أشكرك على ثقتك الغالية ، وعلى فكرة دا أول تاج يتبعتلى
ثانيا : أعتذر عن تأخرى في الرد عليه بسبب انشغالى
اجاوب بقى

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟
هأختار عصر القائد العظيم صلاح الدين الايوبي
ذلك القائد النبيل الذي سار علي نهج الخليفة عمرو بن الخطاب في توحيده للعرب واسترداد بيت المقدس
ذلك الزعيم العادل التي شهدت فترته عدلا و صلاحا
ذلك القائد عرف كلمة السر المفتقدة الآن .. كلمة السر هي توحيد العرب
أما أن كان السؤال يقتصر علي فترة مابعد الملكية
فطبقا لنظرية أحسن الوحشين
أختار عصر ناصر رغم عيوبه و أخطاءه الجسيمة .. وذلك لإيمانه بالعروبة و القومية

اول اولويه فى حياتك عيلتك ولا شغلك ولا اصحابك؟
اول اولوية في حياتي هي حياتي اللي بيشغلها حبي لعيلتي و حبي لاصحابي و حبي لشغلي و حبي لأحبابي

ايه اكتر حاجه بتحبها فى رمضان؟
اكتر حاجة بحبها في رمضان .. الوحدة
الوحدة اللي أحنا مفتقدنها
في العادي .. كل واحد بيقول يالا نفسي .. محدش همه علي حد .. مفيش حاجة بتجمعنا .. ولا في حاجة مشتركة بينا
أما في رمضان أتفرج كام حاجة بتجمعنا .. أتفرج علي الوحدة اللي بينا
الناس كلها مشتركة في الصيام
زحمة علي الراجل بتاع العرقسوس و التمر
في الساعة الأخيرة الناس كلها بتجري عشان تلحق الفطار
لو ضرب عليك المدفع وأنت لسه في الشارع تلاقي ألف واحد بيعزمك علي الفطار عنده
وتلاقي ألف أيد بتتمدلك بتمرة عشان تفطر عليها
كلنا عندنا طاقة إيمانية عالية .. وبيجمعنا حب التقرب إلي الله في الشهر الكريم
طاقة العطف بتزيد عندنا .. طاقة التقوي وصد المعاصي بتقوي عندنا
كل دي مظاهر للوحدة اللي بتجمعنا في شهر رمضان
ياريت رمضان كان السنة كلها

اوصف ليا اجمل فطار ممكن تفطره
أنا ممكن أفضل أمني نفسي في الصيام بأشكال و ألوان من الأكل ولكن لما يجي وقت الفطار
ببقي عطشان أوي
ويا ويله شفشق التمر الهندى لو وقع في أيدى
أو الخشاف
أو حتي المياه الساقعة
وبعد الشرب ده كله .. كل حاجة علي مائدة الفطار بتتساوى ، وأي حاجة بتقضى الغرض
والفطار يزيد جمال و جمال في وسط اللمة و الصحبة

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
من الطبيعي أن أى حد مش هيقول علي نفسه ظالم
ولكن اللي داق طعم الظلم حتي وأن كان موقعش عليه ووقع علي حد تاني
واللي مؤمن بان الحكم ده مسئولية و عارف كويس أنه هُيسأل يوم القيامة و يتحاسب عليها
يتردد ألف مرة قبل مايفكر يظلم
عشان أتاكد أني حاكم عادل ، هكون دايما متواصل مع الأفراد ومش هيكون في وسطاء بيني و بينهم

اللى بيبوظ الحكام .. نفسهم؟ ولا الشعب؟ ولا الحاشيه المقربه؟
أنا شايف أن كل واحد من التلاتة بيمثل ضلع لمثلث الفساد
الضلع الأول بيبدأ من الحكام أنفسهم .. من نفوسهم الضعيفة و ضمائرهم الخبيثة ، من عدم تحملهم المسئولية والفصل بينهم وبين الشعب
تاني ضلع الحاشية المقربة التي تري في الفساد العام مصلحة لها
أما الضلع التالت من غيره ميكتملش الفساد .. وهو ضلعنا .. ضلع الشعب .. ضلع الصمت .. ضلع الخضوع .. أيوه أحنا بنشارك في الفساد ده بصمتنا و خضوعنا
لا يغير الله مابقوم حتي يغيروا ما بأنفسهم

مين أكتر اعلامي مصري بتحترمه؟
حمدي قنديل

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟

لا .. ما قريتوش

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
كنت هأتمني برضه أنى اشتغل صحفي

ايه تانى بلد تتمنى تعيش فيها بعد مصر؟
إيطاليا .. ومعرفش ليه؟
جايز عشان كانت لغتى التانية في الثانوية إيطالي

اوصف ليا ترتيبات اجمل فرح ممكن تحضره
ساعات كتير الأناقة بتبقي في البساطة
أهم حاجة يكون الطرفين بيحبوا بعض وراضيين ، ويكون كل المعزومين جايين يهنوا من قلبهم

بتراعي كلام الناس والقيل والقال؟ لو اه او لو لا قول لى ليه؟
في أغنية كانت بتقول .. كلام الناس لا بيقدم ولا يأخر .. كلام الناس كلامهم حيرة مش أكتر
أنا مقتنع تماما أنهم في جميع الأحوال هيتكلموا
بس مدام أنا عارف أن أنا صح .. مبتفرقش معايا
بس ساعات الواحد بيغلط وممكن ما يخدش باله .. ساعاتها لو كلام الناس ده من باب النصيحة و الخير لازم أراعيه

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
والله مش عارف
بس عامة الواحد مش هيموت يعني لو ملقاش الموبيل و الكمبيوتر و الكاميرا الديجيتال
بس الحيرة في أنه ياترى العصر ده هيكون أحلى ، ولا هلاقى نفسي بتباع في سوق الرقيق
عامة هأجرب مش هأخسر حاجة .. أبقى أتصل بصاحبى يبعتلى آلة الزمن بتاعته

السعاده هى؟
الرضا عن النفس اللي بييجي من رضا ربنا

عندك أمل ؟؟ أسبابك ؟
أكيد .. عشان أقدر أعيش
مع أن في ساعات كتير أمل بتمشي وتيجي صاحبتها .. اكتئاب

لما تحب تهرب من كل شئ بتروح فين؟
في بداية الأمر لما احب اهرب من شئ .. باروح السرير
علي أمل أن النوم يعالج تفكيرى المشتت ، ولما اصحي باواجه نفسي و أعيد النظر للامور

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
أول ما أختي منة الصغيرة نادتني بـ .. آبيه أحمد

لما بتعمل عمل خيرى بيكون ايه هو دافعك الاول؟
طبعا وجه الله الكريم ، و أني أحس بأني سبب سعادة شخص محتاج
و أحس أن طاقة الخير لسه بخير جواي

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لا .. الحمد لله
وربنا يتوب علي كل اللي بيشربها
قول آمين ياللي بتشربها
أما عن الست اللي بتشرب سجاير ، فالمنظر ده بيضيقني أوي
جايز يكون عشان ده مخالف تقاليدنا .. وكمان نظرتنا للست بأنها حاجة رقيقة ولكن حاجة زي كده طبعا بتبوظ الرقة دي

بتعرف ايدك اليمين من الشمال ازاي؟
الحكاية ده كانت بتمثلى مشكلة عويسة لغاية ما أكتشفت الحل
اعمل نفسي كأني بأكل .. وأشوف أنهي أيد هأمسك بيها المعلقة .. تبقي دي اليمين

ايه اكتر اله موسيقيه بتحبها ؟
بأحب الأورج جدا .. وكان نفسي أتعلمه
وكمان بحب الجيتار الأسباني

فى رأيك ليه الذوق والنخوه اتعدموا؟
ومين قال أنهم اتعدموا .. قلوا ماشي بقي فيهم ندرة ماشي ، لكن اتعدموا لا

ايه الحاجه اللى لو حصلتلك تبقى سعيد قوى؟؟؟
حاجات كتير تخلينا سعيد
لما أشعر برضا الله عني ، اللي من نتايجه رضاي عن نفسي
لما أوضاعنا تتحسن ، و نعيش في جو مليان عدل و صلاح و مصرنا تبقي أحسن
لما أحقق أحلامي ، وأشعر بحب الناس كلها ، لما أصاحب ناس جديدة

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
عمري ما فكرت في الماديات
ولكن لو مصرة أنا بحب الخضرة و الهدوء و الطبيعة و البساطة و الزرع أوي

البحر و لا النيل؟؟؟
النيل .. جايز عشان بأشوفه كتير و ارتبطت بيه

مركب و لا طياره؟؟
جايز عشان مجربتش الطيارة .. فأقدر أقول مركب

مجنون و لا عاقل؟؟
لغاية دلوقتي عاقل .. بس ماأعرفش أيه اللي هيحصل بعد كده
وبرضه مش هأنكر أني ساعات بأستخدم الجنان
في أوقات كتير بيبقي مفيد

تقرأ كتاب و لا تتفرج عليه فيلم؟
أنا بحب القراءة جدا .. ولذلك أفضل الكتاب خاصة وأني بتفاعل مع الكتاب أكتر .. وده طبيعي لأن الكتاب بيرفع درجة التخيل و الرسم الذهني
بعكس الفيلم رغم عشقي للسينما .. لأنه ممكن تحس أنك متلقي لا أكثر

بتمرر التاج لمين؟؟؟
آه .. أهو ده اللي أنا خايف منه
خايف أمرره لحد يدعي عليا .. والدعوات مستجابة في رمضان

أمري لله .. أمرره لــ

عبد الرحمن البورتراوى ، ياسمين بتاعت الحواديت ، زيزى صاحبة البئر ، ماعلينا الجميلة

عاشقة الوطن ، حازم شلبى ، سهر صاحبة أسهر عيون ، المواطن الزهقان ، تمر حنة

فنانة فقيرة ، حاجات إيمان ، صاحبة حياة الأحلام ، ساكنة القلب ، حسام مراد

الأستاذ ، آخر قرصان ، مونمن البنوتة

My Hope$

و أي حد غير الناس دي عايز التاج ، أنا مش هأستخسره فيه .. ياخده وحلال عليه

وكل سنة وأنتم طيبين

رمضان كريم

كل سنة وكل المدونين طيبين
كل سنة وكل الأمة الإسلامية بخير
كل سنة وأحنا أحسن من اللى قبلها
كل سنة و مصـــر أفضل من اللى قبلها
كل رمضان وأحنا إلى الله أقرب

أصدقائى الأعزاء .... أنتم الفائدة العظمى

كنت قد دخلت عالم التدوين لكي أستطيع التنفيس عن نفسى كهدف أساسي ، لذلك فقد أحببت هذا العالم جدا
كنت أحببته فقط .. ولم أكن عشقته بعد

أما الآن فأنا أعشق هذا العالم
وذلك لأنني جنيت فائدة عظمي
فائدة أعظم حتي من التنفيس ذاته
فائدة لم أكن لأتوقعها
الحمد لله

لقد كونت صداقات جديدة .. صداقات أعتز بيها .. كونت صداقات في وقت قصير جدا .. حتي وأن لم أكن رأيتم .. ألا أنني عرفتهم من كتاباتهم .. وأحببتهم .. كل هذا بفضل الله أولا .. ثم بفضل عالم التدوين

ولعلني سأظل أذكر يومى الذى ولا على البال بالخير دائما .. لأن فوائده زادت بواحدة عظيمة .. وهو أنه جعلني أتعرف بأصدقاء جدد و قربهم منيّ .. رغم أن قدماي تصرخ كلما ذكرته
لذلك أهدي هذا البوست لهم .. لكل أصدقائي


صديقي عبد الرحمن البورتراوى
أحمد : المواطن الزهقان
ياسمين و حواديتها
زيزي و البئر و الظمأ
الدكتورة روفى و أنين الناى
أليرون و شباكه القديم
دكتور أشرف حمدى
خيوطها الرفيعة
نورهان كان ياما كان
ماعلينا الجميلة
عاشقة الوطن
سهر صاحبة أسهر عيون
حازم شلبى و أحلامه الصغيرة
شبابيك فنانة فقيرة
حسام مراد شغال
الكفراوى و النايت سموك
مهبول و مهبولة
حبة من حاجات إيمان
صاحبة حياة الأحلام
تمر حنة
مــــمــــكن
مونمن البنوتة
عبير ساكنة القلب
الجميلة My Hope$
تخاريف خلود
آخر قرصان وفساحيته
الأستاذ و عالمه الأفتراضى
بيفالوا سايكو و فنونها الجميلة
صديقتي الصحفية زوزو
بهلول المجهول حتي الآن



هولاء هم أصدقائي الذين الذين تعرفت عليهم من عالم التدوين حتي الآن
و كأول بوست في شهري الثاني في عالم التدوين .. أبعث لهم تحياتى
ليس هذا الأهداء و التحية لهم هم فحسب
ولكن إلى الصداقات التي ستكون فيما بعد طالما ظللت في عالم التدوين الجميل .. إلي الذين سوف أعرفهم من هذا العالم .. إلي صداقاتي القادمة .. أبعث لهم بتحياتي أيضا

آخرة اليوم الذي ولا علي البال

راجع الجزء الأول

راجع الجزء الثانى

في وصف مصر
القديمة

حمدت الله علي كل شئ .. و أكملت سيري .. ولكن التعب كان قد نال منيّ .. قدماي لم تعد تقوي علي حملي .. وجف حلقي .. الشمس وكأنها تعاقبني علي حماقاتي .. ها أنا ألمح ثلاجة ( كولدير ) من بعيد .. أقترب آخذ جرعة ماء مضاعفة لتساعدني علي متابعة رحلتي .. استعدت جزء من طاقتي أثر الشرب .. أسير الآن بشارع ( أبي سيفين ) الشهير بمنطقة مصر القديمة .. امر أمام محطة مترو الملك الصالح

يقال أن المحطة سميت بهذا الأسم لسبب تاريخي

فعندما مات الملك الصالح نجم الدين أيوب .. أرادت شجرة الدر زوجته أن تتكتم علي خبر موته .. خشية أن يعلم الجنود .. فيصيبهم الإحباط في حربهم مع الصليبيين .. فوضعت جثته في تابوت و ألقته في نهر النيل .. سار التابوت في النيل حتي أستقر في منطقة منيل الروضة الآن .. لذلك فسميت المحطة بهذا الأسم

كفانا درس التاريخ هذا .. و لأكمل مسيرتي .. عن يساري الآن مساحة خضراء محاطة بسور حديدي .. و لكن مجموعة من الصلبان مغروسة في هذه المساحة الخضراء .. أتضح الأمر الآن أنها ( مدافن الأمريكان ) كما تقول اللافتة .. و مساحة شبيهة ملاصقة لها و لكن يفصل بينهما سور حديدي كتب علي لافتتها ( مدافن الألمان ) .. يبدو أن هولاء قد جازفوا بال75قرش الأخيرة ، فلم يستطيعوا أن يُدفنوا في بلادهم

طفل الشماتة

مازالت أسير محاذيا لسور مترو الأنفاق .. ها هو طفل صغير نجح في الحصول علي جنيها كاملا من والده بعد معركة دامية .. كم أحسده علي ثراءه
يالك من محظوظ .. آه لو تعلم أنك أغني منيّ بكثيرفي هذه اللحظة
يبدو أن الطفل سمع حديثي مع نفسي .. و أما قد أخذ خبرا بأفلاسي .. لأنه أخذ يلوح بالجنيه في يده عندما مررت من جواره .. ليس هذا فحسب و لكن الغريب أنه أخرج لسانه ليّ . و كأنما يتعمد أن يجعلني أغتاظ .. أنسي أمره فلعله لن يدرك قيمة الجنيه هذا و سيذهب ليشتري به حلوي تهشم أسنانه

أتجه للثلاجة ( كولدير ) لأشرب مرة ثانية .. فليرحم الله كل من يساهم في وضع هذه الثلجات للمارة .. كم يجنوا من الثواب علي ما يفعلوه من خيرا في العطاشي .. مع كل جرعة ماء جديدة و كأنني أبعث للحياة من جديد

و خلقنا من الماء كل شيئا حي

صدق الله العظيم

هذا هو شاب اصطدم بجدار الواقع الخرساني .. و ادرك أن البطالة داء لا دواء له .. فاعتمد علي نفسه .. وضع أمام منزله منضدة صغيرة و عليها تليفزيون و جهاز بلاي ستيشن تو و أمامهما كرسيين .. حشد من الشباب يتسابق علي الفوز في لعبة كرة القدم

آه لو لم يكن الرهان حرام .. لكنت دخلت و لعبتهم .. وحينها سأضمن أن أدخل شقتي من فوق لا من تحت .. و ذلك بعدما أركن الهليكوبتر علي سطح بيتي .. و لكن

التعب في الحلال خيرا و أنفع من الراحة في الحرام

مسجد .. عمرو بن العاص

ها أنا الآن أمام مسجد ( عمرو بن العاص ) .. أول مسجد في مصر و أفريقيا .. و رابع مسجد في الإسلام .. شيده الفاتح ( عمرو بن العاص ) بأمراً من الخليفة ( عمر بن الخطاب ) رضي الله عنهما .. و هذه المنطقة التي أسير فيها الآن لمن لا يعرفها كانت هي مدينة الفسطاط التي أسسها الفاتح ( عمرو بن العاص ) لتكون أول عاصمة إسلامية في مصر
نطاق أمني واسع و سيارات شرطة .. فالمكان الذي سوف أدخله الآن هو مكان أثري قبطي شهير .. مقصدا للسياح الأرثوذكس .. هو شارع ( ماري جرجس ) .. عن يميني الآن مجموعة من البازارات .. و عن يساري الكنيسة المعلقة الشهيرة .. يليها الحصن الروماني الشهير حصن بابليون .. سميت الكنيسة بالمعلقة لأنها بنيت علي برجين من أبراج هذا الحصن

طفل الدولار

ها هو طفل مشاغب .. لغته الأنجليزية كلها ما هي الا كلمتين .. ( ون دولار ) .. يقف أمام سائحين يابانيين شاهرا يده قائلا : ون دولار
الأحمق لا يعلم أنهما لن يفهما ، لأن العملة اليابانية هي الين

الجوع يتسلل إليّ .. اسمع صراخا .. استشعر مصدره .. أنهما قدماي

أخرج من هذا الشارع الأثري .. لأدخل في منطقة عجيبة ليست بها شوارع .. بل هي مجموعة من الحواري المفتوحة علي بعض .. منطقة عشوائية للغاية .. الناس هنا بسيطة .. مجموعة من ربات البيوت يجلسون أمام عتبات منازلهم .. لتقشير الكوسة و تخريط الملوخية و خلافه .. أنهم أدركوا أن هذا الجو أفضل من جو المطبخ الحار .. أن كانوا أساسا يملكون واحدا .. فحياتهم بسيطة خالية من التعقيد .. مجموعة أخري من النساء بدءوا جلسات النميمة .. النميمة اليوم علي ( أم حسين ) .. أسال شخصا يمر من جواري علي الطريق للخروج من متاهة السندباد هذه

أحمد الله .. فلم يكن الحظ السئ حليفي طوال الوقت .. لقد أشتريت ( باكو ) مناديل ورقية صباحا من ال5 جنيه .. ها لم يتبقي سوي منديلين .. لا يهم .. فأنا اتصبب عرقا
أمشي علي أمتداد الطريق السريع .. و علي يميني منطقة أكثر عشوائية من سابقتها .. البيوت مبنية علي قمم شبه جبلية .. بعدها منطقة صنع الجير و الفخار .. عمال بسيطون للغاية .. يصبون الكرانيش السقفية و السرر و خلافه .. لولاهم ما أصبحت بيوتنا جميلة .. و آخرون يصنعون الأواني الفخارية .. لولاهم ما أكلت طاجن البطاطس باللحم .. في وسط كل هذا تستقر بيوت من دور أو دورين علي الاكثر

طفل المافيا

ها هو طفل صغير مزعج .. متنبأ له بزعامة المافيا .. يمسك عصا و يضرب بها ثلاث خراف صغيرة .. الخراف تجري منه .. يأتي خلفهم و يعاقبهم علي أنهم لم يتلقوا الضرب بسعة صدر

آه لو يعلم خروف واحد فقط كم ميلاً سيجري هذا الطفل ، لو فقط مارس أقل حقوقه في الحياة و ( مأمأ ) في وجهه
و لكن يبدو أننا في عام الصمت ، هذا أن كان هذا العام من النوعية التي تحترم ذاتها ذات ال 365 يوم ، و لكني لا أعتقد ذلك

المدينة

لا يوجد فاصل بين هذه العشوائيات و تلك المدينة الجديدة ، و كأنه خط وهمي يفصل بين الفقر و الثراء ( يالها من طبقية ) .. أنها مدينة الفسطاط الجديدة .. أدخل فيها لأتخذ من ظلال مبانيها درعا واقيا من حرارة الشمس .. الهدوء هنا سمة أساسية .. كم يساعد هذا الهدوء المفتقد علي الإبداع .. رغم ذلك لن تصل هذه المدينة لمرتبة تلك المدن الجديدة التي نشاهدها في التليفزيون

وهنا .. من هذا ؟ .. هل هو فعلا؟ .. أم شبيه .. أنه هو أيضا ينظر ناحيتي .. يقترب .. أنه يقترب منيّ
يحتضني قائلا

أبو صلاح ، إيه الصدف الجامدة دي
يااااااا معقول ، عامل إيه يا محمد وإيه أخبارك ، و بتعمل إيه هنا
أنا ساكن هنا ، أنت اللي بتعمل هنا إيه
أنا في واحد صاحبي ساكن هنا ، جاي أزوره

و قبل أن يتهمني أحد بالغباء .. لأنني لم أطالبه بفلوس مادام هو صاحبي .. نعم هو يمكن أن يكون صاحبي .. و لكن صاحبي من الدرجة الثالثة أن جاز التعبير .. تلك الدرجة التي تخجل ( يالهذه الكلمة المملة ) أن تطلب منها مثل ذلك الطلب .. أني حتي لا أعرفه أسمه الثنائي .. هذا سبب .. و السبب الآخر هو أنه لم يتبقي الا القليل .. فما هي الا ساعة حتي أصل أن شاء الله

ياليته كان محموداً أو طارقاً أو معتزاً أو محمداً غيره أو حتي عبد الرحمن النائم الآن في بيته
وودعته .. و أستكملت مشواري .. نال منيّ التعب شوطا .. بل شوطين و الوقت الإضافي أيضاً .. العطش شديد .. المنديل الأخير في يدي قد تحول إلي عصارة معجون المناديل .. العرق يتسلل إلي داخل عيني فيحرقها بملحيته .. لم يعد ظهري مستقيما بل انحني من كثرة المشي .. دقيقتين في الشمس الحارقة و سأتحول إلي بني آدم مشوي يصلح كوجبة تقدم في محلات كنتاكي للحوم البشر

يصرخ صندلي قائلا
لقد تعبت .. لقد هلكت .. اريحني قليلا و ساستكمل معك
اصمت يا أحمق .. أنا من أملكك .. و لست أنت من تملكني .. لماذا صنعت أن لم يكن للسير

ينظر صندلي إلي الأرض .. فهو من هذا النوع الذي يتأدب بالصياح فيه فقط .. و لا تحتاج لضربه
تشترك الآن فقرتي الأخيرة من عمودي الفقري في الصياح مع قدماي و صندلي
أخرج علي الطريق السريع .. هاهي خيالة الشرطة إلي يميني .. عيون تنظر ليّ من سيارات مسرعة و كأنها تقول
ما الذي جاء بهذا المجنون في هذا الوقت من العام إلي هذه البقعة من العالم

منطقة الكوابيس

يستيقظ أحد المسئولين ذو المنصب الرفيع ليلا مذعورا و يردد
أعوذ بالله من الشيطان الرجيم .. أعوذ بالله من الشيطان الرجيم
تأتي له زوجته بكوب ماء قائلة : خير اللهم ما أجعله خير .. كابوس تاني؟؟
كابوس فظيع .. لقد رأيت نفسي و أنا أمشي بسيارتي من منطقة عزبة خيرالله

هذه هي منطقة عزبة خيرالله التي تقع علي مشارف حدود دارالسلام في كلمات بسيطة ..أما في كلمات معقدة .. فشوارعها تحولت إلي مجموعة من برك المستنقعات و المجاري العفنة .. أن كانت هذه أساسا تسمي شوارع بتعرجاتها و مطباتها التي تزعج السائر علي قدميه .. فما بالك بالسيارات .. تلال من القمامة علي الجانبين .. أشعل فيها الناس النار ليتخلصوا منها .. دخان كثيف و رائحة احتراق مخنقة .. كمية رهيبة من الملوثات .. مجموعة من سائقي المكروباصات يتشاجرون .. تركوا سياراتهم في منتصف الطريق .. الركاب ينادون علي السائق .. فهم حتي لا يستطيعوا أن ينزلوا لأن السيارة تقف وسط بركة من مياه المجاري .. كتمت أنفاسي حتي لا أختنق و أسرعت من خطواتي

أحمد ربنا أيها المسئول أنك رأيت نفسك داخل سيارتك في كابوسك .. فماذا كان سيحدث لك لو كنت سائرا علي الأقدام

شخص يركب دراجة يمر من جواري .. أحسده .. سائق لعربية كارو .. أحسده أيضا
رسميا ها أنا عبرت حدود دار السلام .. و لكن يقرب حوال ثلث الساعة لأصل لمنزلي .. أدندن حتي أتناسي الوقت
أحمد الله الذي جعلني أصمد حتي الآن .. هاهو شارعي يلوح ليّ من بعيد
أدخل شارعي فلا أتذكر غير جملة واحدة من أغنية لعبد الحليم حافظ .. ياصحابي يا أهلي يا جيراني ، أنا عايز أخدكوا في أحضاني

عم محمد الحلاق يقف علي عتبة محله .. أرفع رأسي الثقيلة لألقي عليه السلام .. (سلامو عليكم) تخرج منيّ مصحوبة بالوضع سايلنت فلا أسمعها .. وهو أيضا لم يسمعها .. لأنه لم يرد السلام
ها هو منزلي .. أخيرا عرفت قيمتك .. أنت أهدي مكان في العالم

أنظر لصندلي
أوعده بوجبة ورنيشية تلميعية
أوعد قدماي بوجبة ساخنة مقرها تشت ميه بملح
أوعد دنياصورات بطني بوجبة غداء مضاعفة
أوعد رأسي و عضلات جسمي بوجبة نومية طويلة

أحمد الله أن أبي أختار الدور الأول حينما تزوج أمي .. أضغط علي الجرس لأني لا اقوي علي إدخال يدي في جيبي لأستخراج المفتاح .. يُفتح الباب .. ألقي نفسي علي أول كرسي .. أخلع صندلي .. انظر لقدماي .. أنهما تورمتا بالطبع .. أرفع رأسي الثقيلة إلي ساعة الحائط
كنت قد خرجت من مبني الإذاعة و التليفزيون الساعة الثالثة ألا ربع .. و عندما دخلت بيتي دقت السادسة تماما

و لكن في النهاية

وصلت بحمد الله